الاهتمام

هى ايه الحالة اللى بتخليك دايما شايف اللى قدامك احسن واحد فى الدنيا شايفه مهم جدا لدرجة بتوصلك لمرحلة خطر؟ طب ايه شخصيات اللى بتيجى فى حياة الواحد بتأثر فيه و بتقلب حياته كلها؟.. و ليه زى ما الشخصيات دى بتكون سبب ان الواحد مبسوط و فرحان زى ما بتكون سبب انه يبقى زعلان و مكتئب؟ الاجابة بتتلخص فى الآتى الاهتمام الزيادة عن اللزوم خطر، خطر عشان بيحولك لانسان تعيس انسان مش عارف يرضى اللى قدامه ازاى و مهما عمل حاسس انه لسة في كتير يتعمل. الاهتمام و التركيز بيخلى الواحد مبيعرفش يستمتع باللحظة عشان بيفكر هل يا ترى اللحظة اللى جاية الشخص دة هيكون موجود فيها و لا لأ. دايما بيفكر بعد كدة هيعمل ايه خايف يقرب و مش عارف يبعد خايف يتكلم ليقول حاجة تزعل خايف يتاخد عنه انطباع غلط. متفكروش فى الموضوع بطريقة Cheesy عشان دة بيحصل حتى فى الصحاب العاديين اغلب الوقت. الموضوع مش بإيدك، ما الواحد ياما قرى و ياما شاف ألف حاجة بتقول "متهتمش بحد" "متحبش حد اكتر من نفسك" "انت اهم من كل الناس" و جو ابسط نفسك و ملكش دعوة بحد، يمكن بحاول امثل انى اقدر اعمل كدة بس عمرى ما قدرت لأنى دايما برجع اهتم، دايما برجع اخاف، و دايما دايما برجع اتبسط من اقل حاجة الشخصيات دى بتعملها و مهما اقعد اخطط فى حاجات تبسطهم بفضل برده حاسة انى معملتش حاجة. يمكن طول ما الدنيا ماشية كويس مش بتبقى حاسس بحاجة لكن اول ما يحصل اى تغير بسيط من ناحيتهم بتبدأ تقلق و توتر و تحس ان اللى قدامك ممكن يضيع منك مش عشان انت/انتِ "دراما كوين/كينج" لا عشان من كتر حبك للى قدامك خايف يحصل اى حاجة و ينساك او يبدلك بشخص تانى. المهم ان كل دة مش معناه انانية اكيد، الموضوع انك بس مش عارف تعبر و لا عارف تشرح اللى جواك. دى حالة.. مجرد حالة جواك عايز تتأكد انك مميز عند اللى قدامك و ان مهما ناس جم و راحوا فى حياته مش هيحب حد بنفس طريقة حبه ليك. #الاهتمام_يدمر_الصحة_ويسبب_الوفاة